Kenna al-Qaida um sjálfsmorðssprengingu

Yfirvöld á Sýrlandi segja al Qaida standa fyrir sjálfsmorðssprengingu í höfuðborg landsins, Damaskus, í gær. Að sögn létust 11 manns í sprengingunni, 63 særðust. Auk þess hafa 15 afskornir líkamshlutar hafa fundist á svæðinu án þess að eigandi þeirra sé þekktur. Fórnarlömbin voru að mestu leyti óbreyttir borgarar.

Árásarmaðurinn sprengdi sprengjubelti sem hann hafði um sig miðjan þar sem hann stóð milli þriggja rútubifreiða. Tveir fætur, hluti af höfði og sundurtætt innyfli var það eina sem eftir var að tilræðismanninum. Þessar leifar voru látnar liggja á götunni fram eftir degi áður en þær voru þrifnar upp og sendar í erfðafræðirannsókn.

Sprengingin varð rétt áður en vikuleg mótmæli gegn stjórn Bashar al-Assad, forseta landsins áttu að hefjast. Hún vakti mikla reiði ráðamanna og háværar stuðningsyfirlýsingar þeirra við forsetann. En þó hún hafi dregið fókusinn frá mótmælum mörgþúsund manna gegn stjórn hans kom hún ekki í veg fyrir þau. Slík mótmæli hafa verið fastur liður í landinu síðustu mánuði og ná iðulega hápunkti sínum á föstudögum.

Atburðir síðustu mánaða hafa verið blóðugasti þáttur hins arabíska vors, en þar er talið að um 5.000 manns hafi látist síðan mótmælin í landinu hófust fyrir tíu mánuðum.

Hér má sjá myndband þar sem vefmiðillinn Guardian fjallar um sprenginguna.