Maradona: Kæmi mér ekki á óvart ef Guardiola færi til Chelsea

Diego Armando Maradona segir að það myndi ekki koma sér neitt stórkostlega á óvart ef Pep Guardiola myndi taka við Chelsea.

Guardiola er á leiðinni í ótímabundið frí þegar leiktíðinni lýkur hjá Barcelona. Hann hefur ekkert gefið út um það hvenær hann ætlar að þjálfa aftur.

"Guardiola er frábær þjálfari sem ég ber mikla virðingu fyrir. Hann segist ætla í frí en ekki láta ykkur bregða ef hann dúkkar upp hjá Chelsea fljótlega. Abramovich gæti gert honum tilboð sem erfitt væri að hafna," sagði Maradona.

Roberto di Matteo er bráðabirgðastjóri Chelsea og hefur staðið sig vel. Hann er samt ekki öruggur með að fá starfið næsta vetur.