Malky Mackay, stjóri Cardiff hefur augastað á Birni Bergmanni

Svo virðist sem Cardiff hafi áhuga á því að klófesta Björn Bergmann Sigurðsson frá norska félaginu Lilleström en frá þessum var greint í velskum fjölmiðlum um helgina.

Malky Mackay, knattspyrnustjóri Cardiff, mun hafa mikinn áhuga á leikmanninum en stjórinn ætlar sér að styrkja leikmannahópinn vel fyrir næsta tímabil.

Cardiff náði ekki að komast upp í ensku úrvalsdeildina í ár og því þarf að styrkja leikmannahópinn.

Landsliðsmaðurinn Aron Einar Gunnarsson leikur með Cardiff en þeir tveir þekkja hvorn annan vel eftir að hafa leikið lengi saman með landsliðinu.

Fleiri lið hafa áhuga á Birni en félög á borð við Reading, Sunderland ,Everton og Fulham hafa öll sýnt leikmanninum áhuga.