Mikel: Ég vissi aldrei hvar ég hafði Villas-Boas

John Obi Mikel, leikmaður Chelsea, telur að lítil samskipti milli leikmanna og Andre Villas-Boas, fyrrverandi knattspyrnustjóra Chelsea, sé ástæðan fyrir því að stjórinn hafi ekki náð árangri.

Andre Villas-Boas var rekinn frá félaginu fyrr á tímabilinu en liðinu hafði gengið virkilega illa fram að því.

Roberti Di Matteo tók þá við liðinu og hefur komið þeim í úrslitaleikinn í Meistaradeild Evrópu auk þess sem liðið vann enska bikarinn nú á dögunum.

„Það eru allir í liðinu gríðarlega ánægðir með Di Matteo og hvað hann er að gera fyrir liðið," sagði Mikel.

„Í byrjun tímabilsins var ég fastamaður í byrjunarliðinu en þegar leið á tímabilið gerði Villas-Boas einfaldlega allt of margar breytingar og það komst enginn stöðuleiki á."

„Manni fannst maður hafa staðið sig virkilega vel í leik en þá var ég tekinn úr byrjunarliðinu í næsta leik. Maður vissi aldrei hvar maður hafði Villas-Boas."