Sir Alex og Giggs valdir þeir bestu í sögu ensku úrvalsdeildarinnar

Það kemur kannski fáum á óvart en Sir Alex Ferguson, stjóri Manchester United, og Ryan Giggs, leikmaður Manchester United, hafa verið valdir besti stjórinn og besti leikmaðurinn í sögu ensku úrvalsdeildarinnar. Verðlaunin eru veitt í tilefni af tuttugasta tímabili ensku úrvalsdeildarinnar.

Alex Ferguson hefur gert Manchester United tólf sinnum að enskum meisturum á þessum tuttugu tímabilum og Ryan Giggs hefur verið í stóru hlutverki í öllum meistaraliðunum tólf.

Ryan Giggs hefur spilað flesta leiki í ensku úrvalsdeildinni, 598, og hefur afrekaða það að skora á öllum tímabilunum tuttugu. Giggs hefur einnig lagt upp flest mörk eða 126.