David Gill: Peningarnir eru til hjá Manchester United

David Gill, stjórnarformaður Manchester United, fullvissar stuðningsmenn félagsins um að það séu til peningar hjá félaginu til þess að styrkja liðið fyrir næsta tímabil. Sir Alex Ferguson, stjóri United, telur sig þurfa nýja leikmenn til þess að eiga roð í nágrannanna í City á næsta tímabili. City vann enska meistaratitilinn á markatölu eftir harða baráttu við United.

Dortmund-parið Shinji Kagawa og Robert Lewandowski eru tveir af fjölmörgum leikmönnum sem hafa verið orðaðir við Manchester United en önnur tvö nöfn eru Eden Hazard hjá Lille og Gylfi Þór Sigurðsson hjá Swansea/Hoffenheim.

Ferguson fór til Þýskalands á laugardaginn til þess að horfa á Japanann Kagawa og Pólverjann Lewandowski hjálpa Dortmund að vinna þýska bikarinn.

„Það eru án nokkurs vafa til peningar hjá okkur fyrir nýjum leikmönnum. Við borgum ennþá vel hvort sem um er að ræða að borga laun eða greiða fyrir leikmenn," sagði David Gill.

„City hefur augljóslega breytt öllu landslaginu með hversu mikið þeir eru tilbúnir að borga fyrir leikmenn sem og að borga þeim í laun. Fjármagns-háttvísin (Financial Fair Play) er hinum megin við hornið, hún er mikil kappsmál hjá forseta UEFA og verður fróðlegt að sjá hvaða áhrif hún hefur," sagði Gill.