Podolski: Arsenal er rétta félagið fyrir mig

Þýski landsliðsmaðurinn Lukas Podolski viðurkennir að hafa getað valið úr tilboðum en hann hafi valið Arsenal þar sem félagið henti honum best.

Podolski mun ganga í raðir Arsenal frá Köln í sumar en enska félagið keypti hann á tæpar 11 milljónir punda.

"Þeir spila í sömu litum og Köln. Nei, ég er að grínast. Ég fékk fullt af tilboðum en ég vildi spila fyrir stórt félag. Arsenal er með toppstjóra og allt í kringum félagið er flott. Það eru sjaldan neikvæðar fyrirsagnir um félagið," sagði Podolski.

"Liðið spilar góðan fótbolta og ég veit að stemningin á leikjum liðsins er góð þó svo ég hafi ekki komið þangað sjálfur. Ég held að leikstíll liðsins muni henta mér vel. Annars hefði ég ekki farið þangað."