Blackburn féll og Wigan tryggði sætið sitt

Blackburn Rovers mun fylgja Wolves niður í ensku b-deildina en þetta var ljóst eftir að liðið tapaði 0-1 á heimavelli á móti Wigan í ensku úrvalsdeildinni í kvöld. Wigan er jafnframt öruggt með sæti sitt í deildinni eftir þennan sigur. Antolin Alcaraz skoraði eina mark leiksins þremur mínútum fyrir leikslok.

Paul Robinson, markvörður Blackburn, var búinn að bjarga sínum mönnum nokkrum sinnum áður en kom að markinu og sigur Wigan var sanngjarn. Þetta leit ekki vel út hjá Wigan fyrir nokkrum vikum en þetta var sjötti sigur liðsins í síðustu átta leikjum. Antolin Alcaraz skoraði sigurmarkið með flottu skallamark eftir hornspyrnu frá Jean Beausejour.

Blackburn er búið að vera í ensku úrvalsdeildinni frá árinu 2001 en félagið varð enskur meistari árið 1995. Liðið er bara með 31 stig og sex stigum á eftir Queens Park Rangers sem situr í síðasta örugga sætinu þegar aðeins ein umferð er eftir.

Staðan í ensku úrvalsdeildinni.