Evra: Manchester United stórveldið er ekki að fara að hrynja

Patrice Evra, fyrirliði Manchester United, hefur ekki áhyggjur að það sé upphafið að endi sigurgöngu United ef að liðið tapar enska meistaratitlinum til Manchester City. United var með átta stiga forskot fyrir nokkrum vikum en er nú í 2. sæti á markatölu þegar aðeins ein umferð er eftir.

„Ég veit það að ef að við vinnum ekki deildina þá mun fullt af fólki segja að það marki enda stórveldisins og efast um að sigurgangan geti haldið áfram. Það er hinsvegar nóg af hæfileikum hjá félaginu. Manchester United stórveldið er ekki að fara að hrynja," sagði Patrice Evra.

Patrice Evra hefur borið fyrirliðalandið í forföllum Nemanja Vidic en hann hefur spilað yfir 290 leiki fyrir félagið síðan að hann kom frá Mónakó-liðinu árið 2006. Hann hefur á þessum tíma orðið fjórum sinnum enskur meistari með United.

„Við höfum lent í miklum meiðslum og misstum auk þess reynslumikla menn síðasta sumar. Það er ekki auðvelt að finna lausnina strax," sagði Evra. United getur enn orðið enskur meistari en þá þarf liðið að fá fleiri stig en City í lokaumferðinni eða vinna upp átta marka forskot City-liðsins.