Joachim Löw: Skiptir engu máli hvort menn syngi þjóðsönginn

Landsliðsmenn Þýskalands eiga ekki að vera dæmdir af því hvort þeir syngi þjóðsönginn fyrir landsleiki. Þetta segir Joachim Löw, þjálfari karlalandsliðs Þýskalands í knattspyrnu.

„Það er gott mál að syngja þjóðsönginn en það segir ekkert til um gæði leikmanna og er alls ekki merki um að leikmaður sé ekki tilbúinn að gefa allt í leikinn þó hann syngi ekki," segir Löw í viðtali við þýska blaðamenn.

Þjóðverjar mæta Argentínu í æfingaleik á morgun en sumir leikmenn landsliðsins hafa verið gagnrýndir fyrir að taka ekki undir þegar þjóðsöngurinn er spilaður fyrir landsleiki.

„Við erum stoltir af öllu því glæsilega sem liðið gerir og hlut landsliðsins í sameiningu Þýskalands," segir Löw en fjölmargir leikmenn þýska landsliðsins sækja uppruna sinn til landa á borð við Pólland og Tyrkland.

Löw reiknar með hinum 34 ára framherja Miroslav Klose í undirbúningi liðsins fyrir HM í Brasilíu árið 2014.

„Ef Miro er í nægilega góðu formi er hann einn besti framherji í heiminum. Ég mun leggja drög að áætlun fyrir næstu tvö árin með honum," segir Löw.

Klose segist sjálfur reikna með því að lokakeppnin í Brasilíu verði sín síðasta.

„Verði ég hraustur og held áfram að standa mig vona ég að ég geti lokið landsliðsferlinum í lokakeppni heimsmeistaramótsins 2014," segir Klose sem er næstmarkahæsti leikmaður í lokakeppni heimsmeistaramóts frá upphafi með 14 mörk ásamt Gerd Müller.