Manchester United landar Kagawa

Fátt getur komið í veg fyrir að Shinji Kagawa gangi til liðs við Manchester United frá Borussia Dortmund. Félögin hafa komist að samkomulagi um kaupverðið auk þess sem kaup og kjör Kagawa hjá enska félaginu eru frágengin.

Þetta kemur fram í yfirlýsingu frá Manchester United þar sem mikilli ánægju er lýst yfir ákvörðun Kagawa að ganga í raðir enska liðsins.

„Leikmaðurinn á aðeins eftir að standast læknisskoðun og fá atvinnuleyfi í Bretlandi. Reiknað er með því að þau mál verði frágengin fyrir lok júní."

Manchester United og Dortmund hafa átt í viðræðum um japanska landsliðsmanninn í nokkrar vikur. Sir Alex Ferguson mætti meðal annars á bikarúrslitaleikinn í Þýskalandi í maí. Þar sá hann Kagawa skora eitt og leggja upp annað í 5-2 sigri Dortmund á FC Bayern.

Talið er að kaupverðið sé í kringum 12 milljónir punda eða sem nemur rúmum 2,4 milljörðum íslenskra króna. Það getur þó hækkað með tímanum eftir frammistöðu og spiltíma Kagawa upp í 3,6 milljarða króna að því er Guardian-fréttastofan greinir frá.

Kagawa gekk til liðs við Dortmund fyrir aðeins 250 þúsund pund eða sem nemur 50 milljónum króna árið 2006 frá Cerezo Osaka í Japan. Þýska félagið hagnast því ansi vel á japanska miðjumanninum.