Di Canio: Balotelli er eigingjarn

Paolo Di Canio er ekki hrifinn af Mario Balotelli ef marka má ummæli hans í enska götublaðinu The Sun í dag.

Di Canio var umdeildur knattspyrnumaður á sínum tíma en hann er í dag starfandi knattspyrnustjóri Swindon, þar sem hann hefur einnig vakið athygli fyrir hegðun sína og skrautleg ummæli.

Balotelli þótti standa sig vel með ítalska landsliðinu á EM í Póllandi og Úkraínu en hann skoraði til að mynda bæði mörkin í 2-1 sigri liðsins á Þýskalandi í undanúrslitum keppninnar.

„Balotelli er bara eigingjarn. Hann á það skilið að vera sleginn oft utanundir," sagði Di Canio. „Hann gerði tvo góða hluti í leiknum gegn Þýskalandi en annars sá ég bara leikmenn sem beið þess að geta fagnað."

„Balotelli spilar ekki fyrir liðið - bara sig sjálfan. Hann er egóisti sem telur að heimurinn snúist í kringum sig."

„Það ætti frekar að slá Balotelli utanundir en að klappa honum á bakið. Antonio Cassano fór fyrir liðinu á leið sinni í úrslitaleikinn."