Best: Fékk of lítið að spila hjá Newcastle

Leon Best segir að hann hafi ákveðið að yfirgefa Newcastle til að fá að spila meira hjá öðru félagi. Best gekk nýverið til liðs við Blackburn í ensku B-deildinni.

Best kom til Newcastle frá Coventry í ársbyrjun 2010 og skoraði alls tíu mörk fyrir liðið. En eftir að Demba Ba og síðar Papiss Cisse komu til Newcastle mátti Best sætta sig við mikla bekkjarsetu.

„Ég elskaði að spila með Newcastle en upplifði einnig oft mikil vonbrigði. Í byrjun tímabilsins síðasta náði ég að leggja upp mörg mörk fyrir Demba Ba og skora nokkur sjálfur," sagði hann.

„En samt var ég mikið á bekknum, sem er aldrei skemmtilegt. Ég fékk aldrei tækifæri til að sanna mig almennilega með því að spila nógu marga leiki í röð - ýmist vegna meiðsla, komu annarra leikmanna eða þá vegna þess að stjórinn gaf mér ekki tækifæri til þess."