Hodgson ætlar ekki að taka Rio Ferdinand með á EM

Roy Hodgson, nýr landsliðsþjálfari Englendinga, tilkynnir EM-hóp enska landsliðsins í dag og heimildir enskra fjölmiðla herma að hann ætli ekki að taka Manchester United manninn Rio Ferdinand með á mótið. Kyle Walker hjá Tottenham missir væntanlega af EM vegna meiðsla og þá ætlar Hodgson ekki að velja Peter Crouch og Micah Richard.

Rio Ferdinand er orðinn 33 ára gamall og hefur ekki spilað með landsliðinu síðan í 2-2 jafntefli við Svisslendinga í júní í fyrra. Ferdinand hefur verið að glíma við bakmeiðsli síðustu ár en lék 30 leiki með United á þessu tímabili sem er það mesta sem hann hefur spilað frá 2007-08.

Sir Alex Ferguson, stjóri Manchester United, talaði um það á dögunum að skrokkurinn á Rio Ferdinand myndi ekki ráða við það að spila á fjögurra daga fresti.

Þetta verður enn eitt Evrópumótið sem Rio Ferdinand missir af en hann hefur spiklað 81 landsleik frá árinu 1997. Hann var ekki valinn á EM 2000, var í leikbanni á EM 2004 fyrir að skrópa í lyfjapróf og þá komst enska landsliðið ekki á EM 2008.

Roy Hodgson tilkynnir hópinn klukkan 13.00 að breskum tíma eða í hádeginu á íslenskum tíma.