Jamie Mackie búinn að framlengja samning sinn við QPR

Jamie Mackie, framherji Queens Park Rangers og liðsfélagi Heiðars Helgusonar, hefur skrifað undir nýjan samning við félagið og er nú samningsbundinn Lundúnafélaginu til sumarsins 2015. Mackie skoraði sjö mörk á sínu fyrsta tímabili í ensku úrvalsdeildinni þar á meðal "næstum því" sigurmarkið á móti Manchester City í lokaumferðinni.

Jamie Mackie er 26 ára gamall en hann missti úr níu mánuði á síðasta tímabili eftir að hafa tvífótbrotnað í bikarleik á móti Blackburn í janúar 2011.

„Það er frábært tækifæri fyrir mig að geta framlengt samninginn minn. Það eru spennandi tímar framundan hjá klúbbnum. Við héldum sætinu okkar og næsta tímabil verður stórt fyrir QPR," sagði Jamie Mackie í viðtali á heimasíðu félagsins.

Mackie þakkaði stuðningsmönnum QPR fyrir allan stuðninginn ekki síst þegar hann meiddist svona illa fyrir aðeins fimmtán mánuðum. Mackie skoraði 7 mörk í 31 leik í ensku úrvalsdeildinni á þessu tímabili þar á meðal sigurmarkið á móti Liverpool.