Tevez ætlar ekki að biðja Ferguson afsökunar

„Það er engu líkara en að Ferguson sé forseti Englands," sagði Carlos Tevez, leikmaður Manchester City, við argentínska fjölmiðla í dag.

Hann hefur ekki í hyggju að biðjast afsökunar á því að hafa haldið á spjaldi sem á stóð „Hvíl í friði, Fergie" á sigurhátíð City á mánudaginn. Þá var liðið að fagna meistaratitlinum sem það vann daginn áður.

City baðst afsökunar fljótlega eftir að atvikið kom upp en sjálfur segist Tevez ekki sjá eftir neinu.

„Það segir enginn að hann þurfi að biðjast afsökunar í hvert sinn sem hann talar illa um leikmenn eða segir eitthvað hræðilegt um mig," bætti Tevez við.

„Svo þegar einhver stígur fram og segir brandara - þá á sá hinn sami að biðjast afsökunar. Ég ætla ekki að gera það."

Tevez var í byrjunarliðinu þegar að City vann 3-2 sigur á QPR en var skipt af velli í seinni hálfleik. City vann leikinn og þar með deildina með því að skora tvívegis í uppbótartíma.

En Tevez missti af sigumarkinu sem landi hans, Sergio Agüero, skoraði.

„Ég var kominn inn í búningsklefann. Ég hélt að þetta væri búið eftir að Dzeko skoraði. Ég fór því ekki neitt. En svo skoraði Kun og allt varð vitlaust."

Hann var spurður um framtíðina en vildi lítið segja um hana. „Nú ætla ég að taka því rólega með fjölskyldu minni. Við skulum svo sjá til."