Endurkomu Rio Ferdinand seinkar um tvær vikur

Rio Ferdinand er meiddur á nára og hefur því misst af fyrstu leikjum Manchester United á tímabilinu. Nú lítur út fyrir það að hann spili ekki fyrr en í fyrsta lagi um miðjan septembermánuð.

Sir Alex Ferguson, stjóri Manchester United, var að vonast til þess að Rio Ferdinand gæti spilað leikinn á móti Southampton um helgina en af því verður ekki og hinn 33 ára gamli miðvörður verður hvíldur fram yfir landsleikjahlé.

Sir Alex verður því áfram í vandræðum í miðvarðarstöðunni við hlið Nemanja Vidic. Chris Smalling og Phil Jones eru báðir á meiðslalistanum en Jonny Evans var kominn á bekkinn í sigrinum á Fulham.

Fyrsti leikur Rio Ferdinand á tímabilinu verður væntanlega á móti Wigan Athletic sem fram fer á Old Trafford 15. september næstkomandi.