Rodgers: Þurfum ekki eldflaugasérfræðing til að sjá að Carroll er bara varaskeifa

Brendan Rodgers, stjóri Liverpool, ætlar landsliðsframherjanum Andy Carroll ekki stórt hlutverk hjá Liverpool á þessu tímabili þrátt fyrir að það séu aðeins 18 mánuðir síðan að Liverpool keypti Carroll á 35 milljónir punda frá Newcastle.

Enskir fjölmiðlar hafa orðað Andy Carroll við Newcastle í allt sumar og það bjuggust flestir við því að hann myndi yfirgefa Anfield. Það hefur ekki gerst og nú þarf þessi stóri og stæðilegi framherji væntanlega að sætta sig að sitja mikið á bekknum í vetur.

„Það þarf engan eldflaugasérfræðing til þess að sjá að Carroll er bara varaskeifa. Ég veit samt ekki hvort að félagið hafi efni á því að hafa 35 milljón punda mann sem þriðja kost í framlínunni," sagði Brendan Rodgers í viðtali á Sky Sports.

Andy Carroll hefur komið inn á sem varamaður í fyrstu tveimur leikjum Liverpool í ensku úrvalsdeildinni á þessu tímabili en hefur þó aðeins spilað í 20 mínútur samanlagt.