Mancini: Yaya Toure eins og Ruud Gullit

Roberto Mancini, stjóri Manchester City, hefur líkt Fílbeinsstrendingnum Yaya Toure við Ruud Gullit þegar sá síðarnefndi var upp á sitt besta með AC Milan og hollenska landsliðinu. Yaya Toure hefur spilað stórt hlutverk hjá City í vetur og skoraði bæði mörkin í mikilvægum sigri á Newcastle um síðustu helgi.

„Yaya er frábær af því að hann hefur allt. Hann er sterkur, fljótur, með góða tækni og getur spilað margar stöður á vellinum," sagði Roberto Mancini um Yaya Toure. Yaya Toure hefur skorað 6 mörk og gefið 6 stoðsendingar í 31 leik í ensku úrvalsdeildinni á þessu tímabili og City-liðið hefur náð í 71 stig í þessum leikjum.

„Hann er í mínum huga leikmaður eins og Ruud Gullit var. Hann getur þetta samt ekki einn og hann þarf aðra tíu leikmenn með sér inn á vellinum," sagði Mancini.

„Það er samt augljós að hann er heimsklassaleikmaður því annars hefðum við ekki náð í hann. Hann hefur líka mikla reynslu frá því að spila með Barca og þá hefur hann hugarfar sigurvegara. Hann er líka góður maður sem er annar mikilvægur kostur," sagði Mancini.