Fjöldi leikmanna sem hefur unnið ensku deildina með tveimur félögum tvöfaldaðist

Englandsmeistaratitillinn sem Manchester City tryggði sér í gær var merkilegur fyrir margra hluta sakir. Til dæmis var um fyrsta Englandsmeistaratitilinn að ræða hjá félaginu í 44 ár auk þess sem hann vannst með síðasta marki tímabilsins. Þá fjölgaði leikmönnum sem hafa unnið ensku úrvalsdeildina með tveimur félögum úr þremur í sex.

Enska úrvalsdeildin var stofnuð árið 1992 en þá gerðu liðin í efstu deild á Englandi sjónvarpsréttarsamning við Sky-sjónvarpsstöðina án aðkomu enska knattspyrnusambandsins. Tekjur félaganna jukust til muna, erlendum stjörnum fjölgaði og í dag er deildin án nokkurs vafa sú vinsælasta í heiminum.

Þar til í ár höfðu aðeins þrír leikmenn verið í sigurliði í ensku úrvalsdeildinni með tveimur félögum. Norðmaðurinn Henning Berg vann titilinn með Blackburn 1995 og Manchester United 1999. Frakkinn Nicolas Anelka vann titilinn með Arsenal 1998 og með Chelsea 2010. Þá var Englendingurinn Ashley Cole í sigurliði Arsenal 2002 og 2004 en einnig meistari með Chelsea árið 2010.

Þeir Gael Clichy frá Frakklandi, Kolo Toure frá Fílabeinsströndinni og Argentínumaðurinn Carlos Tevez, leikmenn Manchester City, bættust í gær í þennan fámenna hóp farandverkamanna sem hafa fagnað titlinum með tveimur félögum.

Clichy vann titilinn árið 2004 með Arsenal og sömu sögu má segja um Kolo Toure. Arsenal fór einmitt taplaust í gegnum timabilið 2003-2004. Carlos Tevez vann titilinn tvö ár í röð með Mancheter United, árið 2008 og 2009.