Barton á leið í langt bann: Ég missti aldrei stjórn á mér

Joey Barton, fyrirliði Queens Park Rangers, missir væntanlega af mörgum leikjum í byrjun næsta tímabils eftir uppákomuna í leik Manchester City og Queens Park Rangers í gær.

Barton hneykslaði marga með hegðun sinni í gær þegar hann var rekinn útaf fyrir að slá niður Carlos Tevez og sparkaði síðan niður Sergio Aguero eftir að hann fékk rauða spjaldið.

Barton fær í það minnsta fjögurra leikja bann af því að þetta var annað rauða spjaldið hans á tímabilinu en það er ekki hægt að sjá annað fyrir sér en að enska sambandið bæti við nokkrum leikjum eftir sorglega framkomu fyrirliða QPR. QPR gæti því verið án Barton í langan tíma í haust.

Barton reyndi að afsaka sig á twitter. „Fólk gleymir því að það var Tevez sem byrjaði þetta allt með því að slá mig í hausinn. Það eina sem ég get gert er að biðja liðsfélagana og stuðningsmennina afsökunar. Ég held því samt enn fram að þetta hafi ekki verið rautt spjald," skrifaði Joey Barton.

Það vakti þó enn meiri athygli það sem kom næst. „Ég missti aldrei stjórn á mér eftir að rauða spjaldið var farið á loft. Einn af mínum samherjum talaði um það ég reyndi að taka einn þeirra manna með mér útaf. Það tókst ekki en guð elskar þá sem láta reyna á hlutina," bætti Barton við.