Juventus vill tefla fram van Persie og Suarez

Ítalska knattspyrnufélagið Juventus hefur tjáð Robin van Persie að það vilji að Hollendingurinn spili í framlínu liðsins við hlið Luis Suarez, framherja Liverpool. BBC greinir frá þessu.

Juventus er eitt þriggja liða sem sýnt hafa Hollendingnum áhuga. Manchester-liðin City og United vilja einnig sýnt Hollendingnum áhuga þó aðeins sé staðfest að United hafi gert tilboð í van Persie. Því tilboði, sem talið er hafa verið í kringum 10 milljónir punda eða sem nemur tveimur milljörðum króna, var hafnað.

Van Persie neitaði á dögunum opinberlega að skrifa undir framlengingu á samningi sínum við Arsenal sem rennur út að ári. Talið er að forráðamenn Juventus vilji með þessu sýna van Persie þann metnað sem Hollendingurinn er sagður hafa. Í yfirlýsingu Van Persie á dögunum sagði hann metnaðarleysi forráðamanna Arsenal hafa orðið til þess að hann þyrfti að yfirgefa félagið.

Talið er að forráðamenn Liverpool vilji umfram allt halda Suarez hjá félaginu. Úrúgvæinn er samningsbundinn félaginu til ársins 2016 og hefur Brendan Rodgers, knattspyrnustjóri félagsins, hafið viðræður við Suarez um framlengingu á samningnum.

Van Persie var markakóngur ensku úrvalsdeildarinnar á síðustu leiktíð með 30 mörk í 38 leikjum. Hollendingurinn 28 ára var auk þess valinn leikmaður tímabilsins af kollegum sínum í deildinni og fréttamönnum.

Suarez hefur skorað 15 mörk fyrir Liverpool síðan hann gekk til liðs við félagið í janúar 2011. Hann var á síðustu leiktíð dæmdur í átta leikja bann fyrir kynþáttaníð í garð Patrice Evra, varnarmanns Manchester United.