Rodgers þarf ekki að skila Liverpool Meistaradeildarsæti

John Henry, aðaleigandi enska úrvalsdeildarfélagsins Liverpool, segist ekki gera þá kröfu til nýs knattspyrnustjóra Brendan Rodgers að Liverpool vinni sér sæti í Meistaradeild Evrópu á næstu leiktíð.

„Við viljum ekki setja neina pressu á Brendan með því að segja að hann þurfi að koma okkur í Meistaradeildina á þessu tímabili. Auðvitað viljum við komast þangað, við viljum það öll eins og hvert einasta félag í úrvalsdeildinni," hefur Guardian eftir Henry.

Rodgers tók við starfi knattspyrnustjóra Liverpool af Kenny Dalglish. Dalglish, goðsögn sem leikmaður og knattspyrnustjóri Liverpool á 9. áratug síðustu aldar, var látinn taka pokann sinn þar sem árangurinn þótti valda vonbrigðum.

„Mér fannst það raunhæft (að ná Meistaradeildarsæti) á síðustu leiktíð en við vorum langt frá því. Nú erum við aðeins að reyna að koma á stöðugleika. Það ætti að vera eitt markmiða okkar," segir Henry.

Liverpool hafnaði í áttunda sæti en vann sér þó inn þátttökurétt í forkeppni Evrópudeildarinnar með sigri í deildabikarnum.