Oscar búinn með læknisskoðun hjá Chelsea

Brasilíski miðjumaðurinn Oscar hefur greint frá því að hann hafi farið í læknisskoðun hjá enska úrvalsdeildarfélaginu Chelsea. Hann ætlar þó ekki að taka ákvörðun um framtíð sína fyrr en að loknum Ólympíuleikunum.

„Ég fundaði aðeins með lækni félagsins, ekkert meira. Ég hef ekki skrifað undir neitt og mun bíða fram yfir Ólympíuleikana með að ákveða mig."

Oscar lét þessi orð falla í viðtali að loknum 2-0 sigri Brasilíu á Ólympíuliði Breta í æfingaleik á Riverside-leikvanginum í Middlesbrough í gær.

Hinn tvítugi Oscar átti frábæran leik með Brasilíu í gær. Hann viðurkennir að draumur hans sé að spila í ensku úrvalsdeildinni.

„Allir brasilískir leikmenn eiga þann draum. Ég, líkt og allir aðrir, vil spila í Evrópu og í ensku úrvalsdeildinni," sagði Oscar sem fyrir skemmstu lét hafa eftir sér í viðtali að hann væri ekki á förum frá Internacional í Brasilíu. Annað hljóð virðist komið í koppinn fyrst kappinn ákvað að sækja lækni Chelsea heim.