Björn Bergmann: Draumur orðinn að veruleika

Skagamaðurinn Björn Bergmann Sigurðarson er formlega genginn í raðir Wolves í ensku Championship-deildinni í knattspyrnu.

Björn er í viðtali á heimasíðu félagsins en allt viðtalið má sjá hér.

„Að flytja til Englands og ganga til liðs við Wolves má líkja við draum sem er að verða að veruleika," segir Björn Bergmann við Englendinganna og má greina að hann hafi litið á Noreg sem stökkpall í meira spennandi verkefni.

„Ég yfirgaf Ísland fyrir þremur árum til þess að spila í Noregi og síðan þá hef ég alltaf viljað taka skrefið til stærra félags," segir Björn Bergmann.

„Nú, þremur árum síðar er draumurinn orðinn að veruleika. Það er gott að það sé búið að ganga frá þessu svo ég geti haldið til Írlands og kynnst öllum," segir Björn Bergmann en liðsfélagar hans eru í æfingaferð á Írlandi.

Hjá Wolves hittir Björn Bergmann fyrir félaga sinn úr íslenska landsliðinu Eggert Gunnþór Jónsson.

„Ég þekki Eggert úr landsliðinu og hann er frábær náungi. Það er gott fyrir mig að hann sé hér og ég hlakka til að hitta hann," segir Björn Bergmann.

Um mánuður er síðan gengið var frá kaupum Wolves á Birni Bergmann frá Lilleström. Forráðamenn norska félagsins kröfðust þess engu að síður að Björn Bergmann spilaði með liðinu fram í miðjan júlí.

„Lilleström má líkja við fjölskyldu mína og ég vildi hjálpa þeim eins mikið og ég gat," segir Björn Bergmann sem spilaði þrjá leiki með norska liðinu eftir að gengið var frá kaupunum.

Um líkamegt atgervi sitt og form segir Skagamaðurinn:

„Ég hef verið að spila knattspyrnu svo ég er í góðu formi og sterkur en gæðin eru örugglega töluvert meiri hér."