AC Milan vann Chelsea og Zlatan skoraði í fyrsta leik fyrir PSG

AC Milan þurfti ekki Zlatan Ibrahimovic til að vinna Evrópumeistara Chelsea í æfingaleik á Sun Life Stadium í Miami í Bandaríkjunum í nótt. Zlatan sjálfur skoraði fyrir sitt nýja lið í sínum fyrsta leik með Paris Saint-Germain.

Urby Emanuelson skoraði eina mark leiksins þegar AC Milan vann Chelsea 1-0. Sigurmarkið kom á 68. mínútu leiksins eftir skyndisókn og skot Stephen El-Shaarawy í varnarmann Chelsea. 57.748 manns mættu á leikinn í Miami í nótt.

Þetta var annað tap Chelsea-liðsins í röð í Bandaríkjaferðinni en liðið tapað 2-3 fyrir úrvalsliði MLS-deildarinnar í síðustu viku.

Það tók Svíann Zlatan Ibrahimovic aðeins þrjár mínútur að skora í sínum fyrsta leik með Paris Saint-Germain þegar liðið gerði 1-1 jafntefli við D.C. United í Washington.

Zlatan gerði ekki mikið meira í leiknum enda tekinn útaf strax á 38. mínútu. Leikurinn tafðist í 45 mínútur vegna eldinga og D.C. United jafnaði metin úr víti skömmu eftir að leikurinn byrjaði á nýjan leik.