Mun Owen Hargreaves leysa Barton af hjá QPR? - æfir með Heiðari og félögum

Owen Hargreaves, fyrrum leikmaður Bayern München, Manchester United og Manchester City æfir þessa dagana með liði Queens Park Rangers en þessi 31 árs gamli miðjumaður er með lausan samning eftir að City-liðið lét hann fara.

Hargreaves sló í gegn hjá Bayern á sínum tíma og vann sér sæti í enska landsliðinu en hefur verið plagaður af meiðslum síðan að hann kom til Manchester United árið 2007. Hann spilaði sem dæmi aðeins fjóra leiki á sínu eina tímabili með Manchester City.

„Owen er að æfa með okkur en það er engin skuldbinding í gangi hvorki hjá okkur né honum. Hann er að reyna að halda sér í formi og við erum ánægðir að geta hjálpað honum," sagði Mark Hughes, stjóri QPR á heimasíðu félagsins.

Mark Hughes er þegar búinn að ná í sjö nýja leikmenn til félagsins og þar á meðal er Blackburn-leikmaðurinn Junior Hoilett sem kom til QPR í gær.

Queens Park Rangers verður án miðjumannsins Joey Baron í fyrstu tólf leikjum tímabilsins eftir að Barton missti algjörlega stjórn á sér í lokaleik síðasta tímabils. Hver veit nema að Owen Hargreaves muni hjálpa Hughes við að leysa Barton af á fyrsta þriðjungi tímabilsins.