Ferguson segist geta lært af Mancini

Sir Alex Ferguson, stjóri Man. Utd, er á því að United hafi tapað titilbaráttunni, sem reyndar er ekki búin, gegn Everton. Þeim leik lyktaði með jafntefli, 4-4, en United missti niður 3-1 og 4-2 forskot í leiknum.

Ferguson viðurkennir að hann megi læra ýmislegt af Roberto Mancini, stjóra Man. City, síðustu vikur.

"Tíminn okkar rann út í leiknum gegn City en Mancini gat leyft sér að setja fimm leikmenn í vörnina. Það er ítalska aðferðin og kannski ætti maður stundum að beita henni," sagði Ferguson.

"Það hefði kannski orðið þess valdandi að við hefðum ekki klúðrað leiknum gegn Everton. Ef við hefðum gert hlutina aðeins eins og City þá væri staðan líklega önnur."

Ferguson er engu að síður stoltur af því að hans lið vilji sækja þó svo það hafi kostað mikilvæg stig gegn Everton.

"Það er ekki í okkar eðli að pakka í vörn og ég vil trúa því að sóknarstíll United sé ástæðan fyrir því að félagið er heimsfrægt. Ef við töpum aftur á móti titlinum þá er það út af þessum Everton-leik."