Vertonghen líklega á leiðinni til Spurs

Jan Vertonghen, félagi Kolbeins Sigþórssonar hjá Ajax, hefur gefið sterklega til kynna að hann sé á leiðinni til Tottenham í sumar. Þessi belgíski varnarmaður var frábær í vetur og var valinn besti leikmaður hollensku úrvalsdeildarinnar.

Bæði Tottenham og Arsenal hafa verið með hann í sigtinu og var lengi vel talið að hann færi til Arsenal. Af því verður líklega ekki.

"Ég skulda Ajax mikið og ég hef alltaf gefið félaginu 100 prósent. Ég er mjög þakklátur öllum hjá félaginu," sagði Vertonghen en hann vonast til þess að Ajax standi ekki í vegi fyrir því að hann komist til Englands.

"Það væri skelfilegt ef það verður mikið vesen fyrir mig að fara. Ég vona að Ajax fari ekki fram á of mikið fyrir mig. Auðvitað vil ég að Ajax fái sanngjarnt verð en það sem Tottenham er að bjóða er mjög sanngjarnt."

Samningur Vertonghen við Ajax rennur út eftir ár.