Fulham kannast ekki við tilboð Liverpool í Dempsey

Enska úrvalsdeildarfélagið Fulham neitar því að félagið hafi fengið nokkuð tilboð í Bandaríkjamanninn Clint Dempsey. Liverpool sýnir kappanum mikinn áhuga.

Á heimasíðu Fenway Sports Group, eiganda Liverpool, stóð í morgun að félagið hefði bætt Clint Dempsey við liðið sem var einum leik frá því að vinna sigur í enska bikarnum í knattspyrnu á síðustu leiktíð.

Forráðamenn Fulham komu af fjöllum og sögðust ekki hafa fengið nein tilboð í sóknarmann sinn. Í kjölfarið var fréttin á heimasíðu Fenway Sports Group fjarlægð að því er Guardian greinir frá.

Áhugi Liverpool á Dempsey er óumdeildur og Brendan Rodgers, knattspyrnustjóri Liverpool, staðfestir í viðtali á heimasíðu félagsins að spurst hafi verið fyrir um Dempsey.

Verðmiðinn virðist, eins og yfirleitt, vera helsta vandamálið því Dempsey á aðeins ár eftir af samningi sínum við Lundúnarfélagið og gæti farið frjálsri sölu að samningstímanum loknu.

Liverpool er sagt vera tilbúið að greiða tíu milljónir punda fyrir kappann eða sem nemur um tveimur milljörðum íslenskra króna fyrir Dempsey. Forráðamenn Fulham telja verðið hins vegar vera of lágt.