Einkaflugvél eiganda Aston Villa sótti Solskjær til Noregs

Ole Gunnar Solskjær, þjálfari norska liðsins Molde og fyrrum leikmaður Manchester United, á í viðræðum við Aston Villa um að taka við enska liðinu en Villa hefur fengið leyfi frá Molde til að tala við Solskjær.

Solskjær er á fullu að sinna sínu starfi í Noregi enda tímabilið í gangi en bandaríski eigandi Villa átti svar við því. Randy Lerner sendi nefnilega einkaflugvél sína eftir Solskjær í dag. Vélin lenti í

Kristiansund í gær og flaug síðan með Solskjær til Birmingham í dag.

Solskjær var því ekki með á æfingu hjá Molde í dag en leikmenn liðsins fengu ekki leyfi til þess að ræða við norska fjölmiðla.