Swansea nálægt því að ná samningum við Hoffenheim

Samkvæmt fjölmiðlum í Wales er Swansea á góðri leið með að semja við þýska liðið Hoffenheim um kaupverð á Gylfa Þór Sigurðssyni.

Gylfi Þór lék á síðari hluta tímabilsins í ensku úrvalsdeildinni með Swansea og sló í gegn. Hann er þó samningsbundinn Hoffenheim til 2014 en félagið er sagt vilja fá 8-10 milljónir evra fyrrir kappann.

Ekki kemur fram hvað Swansea þarf að greiða fyrir Gylfa en þó er fullyrt að forráðamenn þess séu reiðubúnir að greiða meira en félagið hefur nokkru sinni áður gert fyrir einn leikmann.

Huw Jenkins, stjórnarformaður Swansea, hefur verið í Þýskalandi síðustu daga og hefur átt í samningaviðræðum við Hoffenheim. Viðræðurnar eru sagðar ganga vel og samkomulag handan við hornið.

Gylfi á þó sjálfur eftir að semja um kaup og kjör en hann hefur einnig verið orðaður við fjölda annarra félaga í Englandi, svo sem Newcastle.

Gylfi hefur þó hingað til sagt að hann vilji vera áfram í herbúðum Swansea. Það mun þó einnig ráðast af því hvort að Brendan Rodgers verði áfram knattspyrnustjóri liðsins en í dag var greint frá því að hann hafi hafnað tækifæri til að fara í atvinnuviðtal hjá Liverpool, sem nú er í stjóraleit.