Hoffenheim staðfestir brotthvarf Gylfa

Markus Babbel, knattspyrnustjóri Hoffenheim í Þýskalandi, hefur staðfest að Gylfi Þór Sigurðsson mun ekki snúa aftur til liðsins þar sem hann muni senn ganga til liðs í ensku úrvalsdeildinni.

Gylfi á enn tvö ár eftir af samningi sínum við Hoffenheim en spilaði sem lánsmaður hjá Swansea á síðari hluta síðasta tímabils í Englandi.

„Gylfi er nálægt því að ná samkomulagi við lið í ensku úrvalsdeildinni," segir Babbel á heimasíðu Hoffenheim. „Það á bara eftir að ganga frá síðustu smáatriðunum."

Gylfi kom til félagsins sumarið 2010 og skoraði samtals níu mörk í 26 leikjum í þýsku úrvalsdeildinni með liðinu. Hann hefur helst verið orðaður við Tottenham og Liverpool í Englandi.