Vaz Te skaut West Ham upp í úrvalsdeildina

Ricardo Vaz Te tryggði West Ham 2-1 sigur á Blackpool í dag í úrslitaleik umspilsins um laust sæti í ensku úrvalsdeildinni í fótbolta. Sigurmarkið kom þremur mínútum fyrir leikslok. Vaz Te kom til West Ham í janúarglugganum og hefur raðað inn mörkum en ekkert þeirra var jafn mikilvægt og markið hans á Wembley í dag.

West Ham er því komið upp í ensku úrvalsdeildina eftir aðeins eins árs fjarveru en Reading og Southampton voru áður búinn að tryggja sér sæti í ensku úrvalsdeildinni á næstu leiktíð.

Blackpool byrjaði leikinn vel og fékk þrjú góð færi á fyrstu fimmtán mínútunum. Robert Green varði boltann í stöngina úr þröngu færi frá Stephen Dobbie á 3. mínútu og Matt Phillips fékk síðan tvö fín færi með mínútu millibili en tókst ekki að skora. Green varði í fyrra skiptið en seinna skotið fór framhjá.

West Ham vann sig inn í leikinn þegar á leið hálfleikinn og það var síðan Carlton Cole sem kom liðinu í 1-0 á 35. mínútu eftir að hafa fengið frábæra sendingu frá Matthew Taylor. Cole lagði boltann fyrir sig í teignum og kom honum síðan framhjá Matthew Gilks í marki Blackpool.

Blackpool-liðið var ekki lengi að jafna metin í seinni hálfleik því jöfnunarmarkið kom strax á 48. mínútu. Carlton Cole tapaði boltanum til Matt Phillips sem sendi langan og háan boltann inn fyrir á Tom Ince sem skoraði af öryggi. Blackpool fékk nokkur færi næstu mínútur á eftir en tókst ekki að komast yfir.

West Ham skapaði sér meira þegar leið á hálfleikinn og Kevin Nolan komst nálægt því að skora þegar hann skaut í slánna en áður hafði Matthew Gilks varið vel frá Carlton Cole.

Sigurmarkið kom þó ekki fyrr en á 87. mínútu þegar boltinn hrökk til Ricardo Vaz Te eftir að Cole braust inn í teiginn. Vaz Te þakkaði pent fyrir og þrumaði boltanum upp í þaknetið.