Allardyce: Þessi leikur er stærri en leikurinn í München

Sam Allardyce, stjóri West Ham, segir að úrslitaleikurinn í umspili um sæti í ensku úrvalsdeildinni á Wembley í dag sé stærri leikur en leikur kvöldsins þar sem mætast Bayern München og Chelsea í úrslitaleik Meistaradeildarinnar.

Allardyce mætir með lærisveina sína á Wembley þar sem þeir mæta í Blackpool og í boði er sæti í ensku úrvalsdeildinni á næstu leiktíð. Það er talið að sigurvegarinn vinni sér inn 90 milljónir punda þegar allt er talið til en það gera meira en 18 milljarðar íslenskra króna. Leikurinn er í beinni á Stöð 2 Sport 2 og hefst klukkan 14.00.

„Úrslitaleikur Meistaradeildarinnar er dýrðarleikur en þessi leikur snýst um lífsviðurværi þitt og stöðu. Meistaradeildin er stór keppni en þessi keppni getur breytt lífi fólks. Þessi leikur er stærri en leikurinn í München," sagði Sam Allardyce.

West Ham endaði í 3. sæti í deildarkeppninni og rétt missti af öðru sætinu sem hefði gefið beint sæti í ensku úrvalsdeildinni. West Ham vann örugglega báða leikina gegn Cardiff í undanúrslitunum og hefur unnið fjóra leiki í röð.

Blackpool endaði í 5. sæti deildarinnar en er taplaust í síðustu níu leikjum sínum í deild og umspili. Blackpool sló út Birmingham í undanúrslitunum en bæði liðin áttu það sameiginlegt með West Ham að falla úr ensku úrvalsdeildinni fyrri ári síðan.