Orkuverið gekk Chelsea úr greipum

Enska úrvalsdeildarfélagið Chelsea þarf að leita að nýrri staðsetningu fyrir nýjan leikvang sinn. Malasískt fyrirtæki hafði betur í baráttunni við Lundúnarliðið í útboði Battersea-orkuversins þar sem nýi leikvangurinn átti að rísa.

Tillaga Chelsea gekk út á það að nýta turnana fjóra á orkuverinu í hönnunina á nýja leikvanginum sem átti að manna 60 þúsund áhorfendur. Varðveita átti fleiri hluta orkuversins sem á sér langa sögu.

Stamford Bridge, heimavöllur Chelsea, tekur 42 þúsund manns í sæti sem er töluvert minna en lið á borð við Arsenal og Mancehster United geta boðið heim. Emirates-leikvangur Arsenal tekur um 60 þúsund manns í sæti og Old Trafford í Manchester um 76 þúsund manns.