Rangnick hafnaði West Brom

Þjóðverjinn Ralf Rangnick verður ekki næsti knattspyrnustjóri enska úrvalsdeildarfélagsins West Brom. Steve Clarke þykir nú líklegastur til að fá starfið eins og áður hefur komið fram.

West Brom hefur verið að leita að knattspyrnustjóra eftir að Roy Hodgson hætti til að taka við enska landsliðinu.

„Ralf Rangnick ákvað að hafna tilboði enska úrvalsdeildarfélagsins West Bromwich Albion eftir mikla íhugun," sagði umboðsmaður hans við þýska fjölmiðla í dag.

Rangnick hefur stýrt átta liðum á ferlinum og var síðast hjá Schalke í Þýskalandi. Hann er enn orðaður við Besiktas í Tyrklandi.

Miklar líkur eru taldar á að Clarke taki við liðinu en hann er hættur starfi sínu sem aðstoðarknattspyrnustjóri Liverpool.