Lee Clark tekur við Birmingham

Breskir fjölmiðlar greina frá því í kvöld að Lee Clark sé tekinn við stjórastöðunni hjá Championship-liði Birmingham í ensku knattspyrnunni.

Clark hefur undanfarna daga verið sterklega orðaður við stjórastöðuna. Peter Pannu, stjórnarformaður Birmingham, ræddi í tvígang við Clark og þótti mikið til Englendingsins koma. Clark, sem er 39 ára, stýrði síðast Huddersfield en gerði garðinn frægan á sínum tíma hjá Newcastle og Sunderland.

Clark á erfiða tíma fyrir höndum hjá Birmingham sem hafa glímir við fjárhagserfiðleika. Fjölmargir voru orðaðir við stöðuna eftir að Chris Hughton tók við Norwich. Meðal annars voru Roy Keane og Alan Curbishley taldir líklegir arftakar Hughton.