Engar viðræður við Barcelona

Umboðsmaður Gareth Bale segir að það hafi engar viðræður átt sér stað við spænska stórveldið Barcelona sem þykir kappinn vera of dýr.

Umboðsmaðurinn Jonathan Barnett segir að Tottenham vilji fá 40 milljónir punda fyrir Bale en það sé of hátt verð að mati Börsunga. Barnett segir enn fremur að Barcelona ætli frekar að reyna að fá Jordi Alba frá Valencia.

„Eftir því sem ég best veit þá hefur Barcelona ekki lagt fram tilboð í Gareth," sagði Barnett. „Það virðist sem að þeir ætli frekar að reyna að fá Alba sem er ódýrari kostur fyrir þá."

Bale skrifaði undir nýjan langtímasamning við Tottenham á síðasta ári en hefur áður sagt að hann hefði ekkert á móti því að spila á meginlandi Evrópu einn daginn.

Tottenham náði fjórða sæti deildarinnar í vor en komst þó samt ekki í Meistaradeild Evrópu. Þá er nýbúið að reka knattspyrnustjórann Harry Redknapp sem gæti leitt til þess að bestu leikmenn liðsins hugsi sér til hreyfings.