Redknapp hungraður í annað starf

Harry Redknapp segist ekki vera af baki dottinn og að hann sé afar áhugasamur um að finna sér nýtt starf sem allra fyrst.

Redknapp var stjóri Tottenham í á fjórða ár en var rekinn þaðan í gærkvöldi. Óvíst er hvað tekur við hjá Redknapp sem er 65 ára gamall.

„Ég elska fótbolta. Ég ætla ekki sitja heima hjá mér og vera í fýlu," sagði hann við enska fjölmiðla í dag. „Ég myndi passa í hvaða starf sem er og tel að ég eigi enn mikið inni."

„Alex Ferguson er orðinn sjötugur og er enn besti knattspyrnustjóri heims. Mér líður mjög vel."

„Ég naut þess að vera hjá Tottenham og átti fjögur frábær ár þar. Það hefði ekki getað gengið betur hjá mér."