Redknapp var rekinn

Harry Redknapp er hættur störfum sem knattspyrnustjóri Tottenham eftir að stjórn félagsins ákvað að segja upp samningi hans í gærkvöldi.

„Þetta er ákvörðun sem stjórninni fannst erfitt að taka. Harry kom til félagsins þegar reynslu hans og nálgun á starfið var eitthvað sem við þurftum á að halda," sagði stjórnarmaðurinn Daniel Levy í yfirlýsingu.

Viðræður um nýjan samning hafa staðið yfir lengi. Levy var sagður reiðubúinn að bjóða Redknapp svokallaðan rúllandi 12 mánaða samning en Redknapp var ekki ánægður með það og vildi langtímasamning.

Samkvæmt enskum fjölmiðlum mun þó Redknapp neitað því að segja starfi sínu lausu og því hafi stjórn Tottenham gripið til þessara ráða.

Redknapp var sterklega orðaður við enska landsliðsþjálfarastarfið eftir að Fabio Capello hætti í febrúar. Roy Hodgson var hins vegar ráðinn og nú þarf Redknapp að finna sér nýjan klúbb.

David Moyes, stjóri Everton, og Roberto Martinez hjá Wigan hafa helst verið orðaðið við stöðu Redknapp hjá Tottenham. Frank de Boer, stjóri Ajax, og Andre Villas-Boas hafa einni verið nefndir til sögunnar.

Tottenham varð í fjórða sæti ensku úrvalsdeildarinnar í vor en komst þó ekki í Meistaradeild Evrópu þar sem að Chelsea, sem hafnaði í sjötta sæti deildarinnar, fékk sæti Tottenham fyrir að sigra í keppninni í vor.