Sir Alex: Newcastle mun ráða miklu um það hvar titillinn endar

Sir Alex Ferguson, stjóri Manchester United, treystir á það að Newcastle hjálpi liðinu í baráttunni um enska meistaratitilinn. Newcastle tekur á móti Manchester City á sunnudaginn en seinna um daginn fær Manchester United Swansea í heimsókn.

Ferguson lítur svo á að titilinn sé tapaður vinni City leikinn sinn á móti Newcastle. „Já, það lítur út fyrir það. Það er samt engin spurning um að þetta er erfiður leikur fyrir City. City á tvo leiki eftir og ef þeir vinna þá báða þá verða þeir meistarar," sagði Sir Alex Ferguson og hann býst ekki við að United-liðið geti unnið upp markatölu-forskot Chelsea.

„Þeir verða samt að vinna Newcastle og það er krefjandi leikur fyrir þá. Það er alltaf erfitt að fara þangað og Newcastle-liðið er að spila vel," sagði Ferguson en Newcastle vann 2-0 útisigur á sjóðheitu liði Chelsea í vikunni.

„Það er mjög erfitt að vinna Chelsea á Brúnni. Við höfum ekki náð því ekki í átta ár og þessi sigur Newcastle á Chelsea sýnir að þeir eru í góðum gír. Þetta verður ekki auðveldur leikur fyrir City og Newcastle mun ráða miklu um það hvar titillinn endar," sagði Ferguson.