Stjóri Gylfa er ekki sáttur með ummæli Mancini

Brendan Rodgers, stjóri Gylfa Þórs Sigurðssonar og félaga í Swansea, er allt annað en sáttur með ummæli Roberto Mancini, stjóra Manchester City, fyrir leik Swansea-liðsins á móti Manchester United um helgina.

Manchester-liðin eru jöfn að stigum á toppnum þegar tvær umferðir eru eftir og stjórar liðanna, Mancini og Ferguson, eiga í sálfræðistríði í fjölmiðlum.

Það sem Rodgers er ósáttur með er að Mancini sagði að United gæti unnið Swansea 10-0 og að þetta væri því auðveldur leikur fyrir lærisveina Sir Alex Ferguson.

"Hann [Mancini] kom hingað til okkar og við unnum 1-0 þar sem við vorum augljóslega betra liðið og það þrátt fyrir að Roberto væri búinn að eyða 235 milljónum punda í sitt lið. Ég held að hann viti það betur en flestir að þetta verður ekki auðveldur leikur fyrir United," sagði Brendan Rodgers.