Villas-Boas hótar að draga sig úr samningaviðræðum við Tottenham

André Villas-Boas hefur hótað að hætta samingaviðræðum við enska úrvalsdeildarliðið Tottenham. Portúgalinn er afar ósáttur með að félagið eigi enn í viðræðum við aðra kandídata um að taka að sér starfið.

Samkvæmt heimildum Guardian veit Villas-Boas af því að Luka Modric er á leiðinni til Real Madrid í sumar. Það er ekki aðalatriði hjá Villas-Boas sem er þó ósáttur með mismunandi skilaboð sem hann fær úr herbúðum Spurs.

Portúgalinn á að hafa kvartað við félaga sína yfir því að „forráðamenn Tottenham eru að ræða við tíu aðra knattspyrnustjóra." Augljóslega ýkju hjá Portúgalanum en gefur til kynna hve pirraður hann er.

Samkvæmt heimildum Guardian eru það helst Laurent Blanc, landsliðsþjálfari Frakka, og Roberto Martinez, stjóri Wigan, sem eru inn í myndinni á White Hart Lane auk Villas-Boas.

Villas-Boas náði frábærum árangri með Porto í Portúgal og Evrópudeildinni áður en hann tók við Chelsea síðasta sumar. Hjá Lundúnarfélaginu gekk fátt Portúgalanum 34 ára í hag og var hann rekinn snemma á árinu.

Eftir brottför stjórans gek allt Lundúnarfélaginu í hag og vann enska bikarinn auk Meistaradeildarinnar áður en yfir lauk.