Milan er ekki búið að gleyma Aquilani

AC Milan hefur ekki gefið upp alla von um að halda Alberto Aquilani. Hann var í láni hjá félaginu frá Liverpool síðasta vetur og stóð sig vel.

Milan á enn eftir að manna miðjuna sína fyrir næsta vetur en Clarence Seedorf, Gennaro Gattuso og Mathieu Flamini eru allir farnir frá félaginu.

"Það mun koma nýr miðjumaður fyrir lok ágúst. Það gæti verið Aquilani eða einhver annar. Við erum ekki enn búnir að tala við Aquilani. Hann er leikmaður Liverpool," sagði Adriano Galliani, varaforseti Milan.

Ekkert félag hefur enn gert tilboð í Aquilani og Brendan Rodgers, stjóri Liverpool, hefur ekki útilokað að hann eigi sér framtíð hjá félaginu.