Rodgers var bara að passa upp á Agger

Brendan Rodgers, stjóri Liverpool, ætlaði sér aldrei að nota danska miðvörðinn Daniel Agger á móti hvít-rússneska liðinu Gomel í forkeppni Evrópudeildarinnar í gær. Liverpool vann þá fyrri leikinn 1-0 á útivelli.

Daniel Agger hefur verið orðaður við Manchester City að undanförnu og það þótti ýta undir þær sögusagnir að danski miðvörðurinn spilaði ekki leikinn í Hvíta-Rússlandi í gær.

Sky Sports hefur heimildir fyrir því að Liverpool hafi þegart hafnað tveimur tilboðum Manchester City í Agger og Daninn átti einnig að hafa óskað eftir því að vera settur á sölulista.

„Það var alltaf planið að skilja Agger eftir heima. Það þekkja allir meiðslasögu hans. Hann byrjaði seinna að æfa en aðrir og er ekki kominn á réttan stað í undirbúningnum," sagði Brendan Rodgers eftir leikinn.

„Hann er kominn í form en við þurfum að passa sérstaklega upp á hann vegna meiðslasögu hans," sagði Rodgers en Daniel Agger er með samning við Liverpool til sumarsins 2014. Það þykir ekkert líklegt að Liverpool sé tilbúið að selja hann og Daninn hefur áður tekið vel í viðræður um nýjan samning við Liverpool.