Muamba sparkaði bolta í sumarfríinu sínu

Fabrice Muamba, miðjumaður Bolton og sá sem var lífgaður við í miðjum bikarleik á White Hart Lane eftir hjartastopp í mars, segist hafa spilað fótbolta í sumarfríinu sínu.

Bati Muamba hefur verið ótrúlegur en hjarta þessa 24 ára gamla manns hætti að slá í 78 mínútur eftir að hann hné niður í bikarleiknum á móti Tottenham.

Muamba segist hafa farið í fótbolta með vini sínum í sumarferð til Dúbæ í maí aðeins tveimur mánuðum eftir að hann hné niður.

„Ég var í sumarfríi og það voru nokkrir fótboltamenn á hótelinu. Starfsmenn hótelsins hafa það fyrir venju að mæta gestunum í fótbolta og ég heyrði í þeim þegar ég við sundlaugina," sagði Fabrice Muamba í myndabandi sem birtist á CNN.

„Ég skellti mér yfir og sagði Shaunu og vinum mínum að ég ætlaði að vera með. Hún spurði mig hvort ég væri viss og ég sagði já og lét vaða," sagði Muamba.

„Ég spilaði bara til gamans og var með í 20 til 25 mínútur. Þetta var bara eins og ég væri á æfingu," sagði Muamba en það er þó ólíklegt að hann mæti aftur inn á fótboltavöllinn á ný þrátt fyrir sannkallaðan kraftaverkabata.