Gerrard var í sjokki eftir skellinn á móti West Brom

Steven Gerrard, fyrirliði Liverpool, bjóst við allt öðru en að Liverpool-liðið myndi steinliggja á móti West Brom í fyrstu umferð ensku úrvalsdeildarinnar um helgina.

West Brom vann leikinn 3-0 en þetta er stærsta tap Liverpool í fyrsta leik tímabilsins síðan 1937. Luis Suarez fann sig ekki í framlínunni, miðverðirnir Daniel Agger og Martin Skrtel fengu báðir dæmt á sig vítaspyrnur og Agger fékk að auki að líta rauða spjaldið.

„Ég var í sjokki eftir þessi úrslit. Þetta var ekki leikur sem átti að fara 0-3," sagði Steven Gerrard við Liverpool Echo.

„Ég sá fyrir að við færum þangað, stjórnuðum leiknum og tækjum með okkur öll stigin til baka en hlutirnir fóru ekki alveg eins og ég bjóst við," sagði Gerrard.

„Það tók okkur fimm mínútur að komast inn í leikinn en eftir það stjórnuðu við leiknum þar til að þeir komust yfir gegn gangi leiksins í lok fyrri hálfleiks. Í seinni hálfleik féllu stóru hlutirnir síðan ekki með okkur," sagði Gerrard.

„Við byrjuðum ekki eins og við ætluðum okkur en það er engin ástæða til að örvænta. Þetta er bara einn leikur og einn slæmur dagur. Eftir 3-0 tap þurfa allir að hugsa sinn gang og það er mikilvægt að ég og aðrir reynsluboltar liðsins tökum ábyrgðina á þessu tapi. Við verðum að komast fljótt í gegnum þetta og koma sterkir til baka á móti Hearts á fimmtudaginn," sagði Gerrard að lokum.