Mourinho vill lána Sahin til Englands

Jose Mourinho, stjóri Real Madrid, segir að það komi vel til greina að lána Nuri Sahin til liðs í ensku úrvalsdeildinni svo hann geti fengið að spila meira.

Sahin gekk til liðs við Real Madrid fyrir ári síðan en fékk lítið að spila með liðinu á síðustu leiktíð.

Hann hefur verið orðaður við Arsenal, Liverpool og Tottenham og samkvæmt enskum fjölmiðlum þykir líklegast að fyrstnefnda félagið verði fyrir valinu.

„Hann gæti lært ýmislegt af þessu," sagði Mourinho. „Og mér er alveg sama hvert hann fer. Það skiptir mig engu máli."

Þá er fullyrt að Brasilíumaðurinn Kaka sé á leið frá Real Madrid en Mourinho segir að engin tilboð hafi borist í kappann.