Allir fá farsíma á Indlandi

Forsætisráðherra Indlands, Manmohan Singh, mun á næstu dögum útdeila farsímum til allra fjölskyldna sem búa undir fátæktarmörkum í landinu. Um er að ræða sex milljón fjölskyldur.

Forsætisráðuneytið á Indlandi hefur ekki staðfest þessar fréttir. Samkvæmt indverska fréttavefnum The Times of India munu yfirvöld í landinu hefja verkefnið 15. ágúst næstkomandi.

Ekki nóg með það að hver einasta fjölskylda muni fá farsíma heldur munu indversk yfirvöld koma til móts við þau vegna símreikningsins og greiða fyrstu 200 mínúturnar.

Þessu fylgir mikill kostnaður fyrir indverska ríkið sem þarf einnig að koma á farsímakerfi á afskekktum svæðum landsins.

Talið er að yfirvöld vilji tengja íbúa Indlands saman og stuðla þannig að auknum almannavörnum og öryggi þegna.